a associaçom

A associaçom sem ánimo de lucro Semente de Lugo constitui-se no dia 30 de janeiro de 2016 com o objetivo de fornecer de um espaço educativo em galego para todas as crianças do concelho de Lugo que tenham entre 2 e  6 anos de idade.

Som objetivos da associaçom os seguintes:

A criaçom de um centro educativo de imersom lingüística em galego baseado na coeducaçom, na laicidade, no assemblearismo, na interaçom com a natureza, no respeito pola autorregulaçom das crianças e na integraçom no contexto do seu bairro, da sua vila e da cultura do povo galego.

A criaçom de espaços de encontro entre educadoras, mais, pais e crianças como excursons, obradoiros, encontros, palestras, exposiçons, atividades formativas, etc.

A criaçom de um fundo bibliográfico que poda ser consultado polas sócias e sócios e outras pessoas interessadas.

Todas aquelas outras açons tendentes a cumprir os fins assinalados e que sejam conformes à lei e decididas polos órgaos competentes.
A Associaçom Semente de Lugo nasce da colaboraçom comprometida e afanosa de pais, mais, profissionais do ensino e crianças em prol da criaçom de um centro de educaçom infantil no rural lucense. Este humilde projeto é o resultado material de umha reclamaçom popular em favor do cumprimento de direitos fundamentais das e dos lucenses no ámbito educativo, a saber: o direito a educar as filhas e filhos em língua galega, promovendo a sua recuperaçom e dignificaçom; o direito a desfrutar de umha educaçom integrada no meio, que valorize e restitua simbolicamente o património cultural galego nos currículos; o direito a umha educaçom que dignifique e visibilize os saberes populares e tradicionais; o direito a umha educaçom integral de caráter comunitário, que facilite o diálogo intergeracional e, entre outros, o direito a umha educaçom humanística, que seja motor de transformaçom social.